لم أحلُمْ أن أكونَ مهندساً .. لكننى تمنيتُ ان يكونَ قلبى .. متوازى الأضلاع .
إفتح ياعبيط
============
باب عمارتنا .. ب يشبه للقلب كتير
الداخل منه .. كتير
والخارج منه .. كتير
يتبروز فوقه .. كتير
ويشخبط فوقه .. كتير
وكتير إتكسّر منُّه إزاز
وكمان .. على طول محتاج يتنضّف
بالمسحوق .. والجاز .
باب عمارتنا ب يشبه للقلب ف شيل الهم
وف إنه ف وقت الدبح ..
ب نطبع فوقه كفوف .. بالدم
وحدانى .. لاخال .. ولا عم
أول ما ب ييجى عليه الليل
بشويش .. يتلم
وينام ع الضلمه .. سرير
يستنى الشمس تعدّى ..
وتكتب بالطباشير .
- إفتح ياعبيط
إترقّى شريط
واستنى الدنيا تشوفك ماتصوَّتش
وتقابلك ب الزغاريد -
باب عمارتنا
فيه كتير .. من قلب اتلّون إسود
لون الجوع
مفعول .. فى المطلق ..
مش فاعل مرفوع .
يشبه تمرين الضغط .. نزول .. وطلوع
ماتوقفش لحد ما يُغمَى عليك
وتقوم .. مش عارف إيدك من رجليك
ولا لاقى لنَفْسَك حَل
عمّال تتنقِّل .. من غازى .. ل مُحتَل
وتصُد قنابل غاز
بقماش مبلول بشوية خَل
وب تِفضَل تبكى ..
كأن الدمع فريضه .
أنا أمى قالت لى .. الحزن قُماشتُه عريضه
لكن .. ماقلتش الحزن مقلِّم
عمرُه ما ب يغِش
أقلامُه .. ب تطبع فوق الوش
وتمِد .. ل جوّه
الدم يسيل
والقلب يكش .
باب عمارتنا
كان يشبه قلبى .. حديد
قبل مايتغش
صدى .. وبقا هَش
الريح ب تطيَّر فيه
وكإنّه شوية قش
واقف عريان .. بلِا هيبه
ب يجُر الخيبه
بقى زى القلب الفاضى .. بدون سكّان
واقف .. غلبان
مستنّى رصاصة رحمه ..
يقولوا .. إتضربت .. ف المليان .
خالد عاطف أبو العزم
ليست هناك تعليقات:
إرسال تعليق