بقلم ... الشاعر / حسام الدين فكري / مصر / ... من روائعه /// اكتشف نفسك ///

اكتشف نفسك
بقلمي : حسام الدين فكري / مصر
.....................
لازم تقاوم
حبستك جوّه نفسك
وقهرتك من ظروفك
والليل النايم تحت رموشك
كل ماتيجي تقبّ..يحوشك
واستسلامك للي رايح واللي جاي
يُلطشك ولايعتذر
مش قُليّل إنت
زي ما انت فاكر
عليّا النعمة إنت كتير
بس دوّر جوّه روحك
واتعب شويّه في التفكير
هتلاقي يا ابني حاجات
ولايوم خطرت ببالك
موجودة عندك إنمّا
ولا عُمرك فكّرت تبصّ
وتفتش وتنكُش
وتمد إيدك تهبش
من دهب روحك المستخبّي
بعد خط النُصّ
افتح بيبانك وانت تشوف
في النهار واحد جديد
أيوه فعلاً عندك حق
هتلاقي برضه صفيح وحديد
مش كله دهب بيلمع
يسحر عيون الناس
سيبك من دا كُله
المهم تلاقي أساس
ترفع راسك لفوق
وتقول شوفوني يا ناس
أنا اللي ماحد فيكم
فكّر في يوم يعرفه
ويغوص جوّه قلبه ويفهمه
أنا برضه إبن ناس
بس الزمن برجله التقيله
عليّا ياما داس
خلاّني تحت الأرض
غرقان في طين ووحل
وماسابلي غير عيون
ممدودة لرب السما
بس العيون مراسيل
فيها الحروف بتميل
وتتمايل وتتشكّل
فوق السحاب تراتيل
تشيل قهر السنين
وتملا قلبي الحزين
بطيور بتغنّي غنوة
كلامها فوق الخيال !