بقلم ... الشاعر / خالد عاطف أبو العزم /

هنا ترقدُ الأميرةُ نَخوَه .. الويلُ لمن يقُضُ مضجعها .

وصايا الحكيم سقنن - قفا - آمون

======================

بدون طبول ..
أو طنطنه ..
أو خطط .
أكبر شجيع .. الكلب ..
وسط القطط .
واكبر سعيد .. الخُرس .. والعميان
واكبر عماره اتهدت .. الإنسان
أجمل تسالى .. نخترع قصه
وأْمَن كلام .. المبنى ف الرخصه
مش كلمه كلمه ..
مبنى حرف ب حرف
ب مونه نزلت من ماسورة صرف
بدون مَرافق ..
والمُرافق شيطان .
أهوَن عذاب .. الضرب بالخرازان
والطعن بالضلمه ف عز الشمس
أكبر جريمه .. الصدق ..
لو بالهمس .
واعظم مبانى .. المبنى للمجهول
وكشك جهل ف سندويتش الفول
وفَخ يمسك ألف عصفوره
وأحلى عيشه .. تدوخ ب تنّوره
تفتح عنيك ف القُبح .. ماتشوفهوش
تصاحبُه .. والنيَّه .. صداقه فاشوش
أحلى الصحاب .. فَرش الحشيش ف الكيس
وأوفى صاحب فى الوطن .. إبليس
أحَن جيب .. جيب اتولد مخروم
وأحلى موته .. هيَّا موتَه فطيس
الديب ب شَفَقَه ب ياكُل الخرفان
وأعلى سلِّم آخرُه فيه تِعبان
إعمل بتطلع وقت مابتنزل
تبقى ف أمان وقت لوقَدَمَك اتزلزل
وقت الطنين .. كون سيّد الدبّان
كتب الحكيم ( سقنن - قفا - آمون )
وصيه لابنُه الآمن المأمون
من شر غضبات الإله ( أنوبيس )
لو هاج وداس ف الخَلق كالأتوبيس
إذا شافُه هايج .. يبتدى يغنّى
ويسُك عينُه وودنُه بالترابيس
البعث بس ح يبقى للمغلوب
ومافيش مسلَّه ..
والهرم مقلوب .
أنوبيس حكم فينا وكان عادل
عداله عورَه .. من إله معيوب

______________________

سقنن - قفا - آمون : حكيم فرعونى إفترضى
أنوبيس : إله الموت عند الفراعنه

خالد عاطف أبو العزم