تغريدات طائر حزين ..... #شعر_عامي_سيف_الدين_رشاد
علي فكرة
يا شعب مصر ليه المصايب
نزلة عليك من كل صايب
مين أنا
بيقولوا شاعر بالمتاعب
لا . لا . أنا كاتب
جاي أعاتب
يا أهل بلدي يا أغلي عندي
من كل حاكم عالي المراتب
قطار الصعيد وأهلي
وكل الحبايب
واللي ماشي وكل راكب
راحوا في لحظة
فيها سارح في هم تقيل
والموظف بالهم ساكب
علي فكرة إيه الحكاية؟
الحكاية
قطار بيسلم علي قطار
وبدل السلام
حضن بيعصر كل راكب
وفيهم حبايبي وأهلي وناسي
فيهم المهموم واللي هايم
ع الوجه خريطة مشاكل
من عيشة جامدة ما فيها فايدة
من كل ناحية ووصلت حكاية
إن إحنا نملة ما لها لزمة
جوا حيطة راكنة وعايشة
والقطار ما هدي وعدي
ع الحيطة بقوة غاشمة
خد روحي بكل قسوة
علي فكرة إيه الحكاية؟
الحكاية
في جسر السويس
نايمين يا عيني تحت التراب
تحت الحديد نقول نجدة
يقولك بكرة والله يحنن
تقول دا عيب في حي
في رئيس
يرد عليك بحاجة تجنن
يقولك العيب في نملة
شد حيلها
تبني عمارة باسمنت السويس
ليه ماتبني باسمنت العريش
أهو دا العيب
اللي خلاها في السما طايرة
ع الأرض واقعة
النملة ياعيني شايلة همومها
ع الكتف وسارحة
تدور علي وطن تاني
أصل الضربة في القلب جارحة
والوطن ياعيني سابها
في إيد قوية لا بترحم
ولا تسيب الرحمة نازلة
أهي دي الفكرة
بقلمي
سيف الدين رشاد
29/3/2021
ليست هناك تعليقات:
إرسال تعليق