قالوا في مسابقة
لكل كلمة سابقة
عن معنى كلمة أم
وقَفت وقُمت واقعة
وحروفي مني ساقعة
ومنين أجيب معاني
نِحن ليها نضم؟
حكايات فاتت وعدَّت
وأمي مِش هِنا
كُنّا زمان شَراكة
في الدمعة والهَنا
كُنتْ أتمنى الأماني
في نفسي أو في حلم
معاها وفي ثواني
الحلم يبقى عِلم
كانت حَسَّه بيَّ
بتحب الحاجة فيَّ
وتسيبها بردو ليَّ
أتمنى وهي تِسمع
تقول أيوه ومالو
بَحِب فيها ضحكة
ترويها بحُب طَالو
لما كانت تنادي
تقول سِت البنات
أجري عليها أيوا
أسبق كل الساعات
كُنت في ديل الهُدوم
خايف من يوم أقوم
تجري مني بعيد
أصحى وأقول أمّايا
يقولوا كانت عِيد
أصرخ نهاري ويِلي
يِتهَد فيَّ حِيلي
ما هي كانت قَمري
نوري في عِز لِيلي
أنده وأقول تعالي
مِشيتي بدري ليه؟
الدمعة يَاه وَجعاني
من غيرك أعمل إيه؟
غريب إني أكمِّل
بعدك في دنيتي
قالوا عني عايشة
لكن حقيقة غايبة
إني بعدك بموت
في كل لحظة بحضن
فيها دمع السكوت
على فكرة من زمان
لا كنت لهم شَايلة
ولا طُوبة فيَّ مَايلة
وحاسس بالأمان
ولا كان معايا فَارِق
مين يغدر أو يفارق
بِيها كانت كفاية
تِملي حياتي برواية
السعد كان ماليها
لكن قَوام بتخلص
وتِوصل للنهاية
وأمي مش معاية
وأمي مش معاية
بقلمي: د/نجوى رسلان
ليست هناك تعليقات:
إرسال تعليق