انت مين
ـــــــــــــــــــــــ
انت مين وابن مين
انت صفر علي الشمال
مش كسر حتي ع اليمين
انت ابن عامل شقيان
انت ابن الفلاحين
انت اللي ابوك بينام جعان
مامعهوش تمن رغيفين
انت الكلب اللي لازم
يهز ديله للمحترمين
اهل السلطه والنفوذ
اللي فوق قوي سأكنين
مانتش من جوقة الفنانين
ولا ابن حضرة مين ومين
ولا امك فلانه وابوك فلان
ولا اونكل صاحب ملايين
انت صفر علي الشمال
مش كسرحتي ع اليمين
انت الشعب الغلبان
انت ابن الناس الشقيانين
انت ابن السائل والمحروم
ابن عابر سبيل مسكين
اللي بتاكل بعينك
المعروض في البتارين
وبطنك بتصرخ ونفسك
تعرف طعمه يامسكين
انت اللي نفسك تنام
يوم في حضن الدفيانين
انسي ياصاحبي واعرف
انت مين وهما مين
لانت اورتيجا وشاكوش
انت يادوب طه حسين
ــــــــــــــــــــــــــــــــــ
شعر السيد حماد
ليست هناك تعليقات:
إرسال تعليق