الي كل ام رحلت
الي روح امي في عيد الام
.......
خمسين سنة
********
خمسين سنه يامّا
عايش انا ف ضلمه
محروم من الضمه
والدفء واللمه
خمسين سنه ياما
عايش انا اعمي
ما حد يرعاني
بالحب والرحمه
ضايع ووحداني
في الدنيا والزحمه
وانتي اللي فيتاني
مشموله بالرحمه
خمسين سنه واكتر
في الدنيا متكدر
عايش بلا امي
محروم من المصدر
فاكر يا دوب شكلك
في حجابك الاخضر
موتك قسم ضهري
شيبني في المصغر
اربع سنين عمري
مش قادر اتذكر
لكني فيه ريحه
للمسك والعنبر
هيا اللي بقيالي
يا حبة المرمر
وصلالي م العالي
م الجنه والكوثر
دايمآ علي بالي
سكناني في الجوهر
كان نفسي يا أمي
أبوس علي رجلك
واقعد بأعتابك
واجلس علي ضلك
واسلك طريق بابك
للرحمة من فضلك
انا جيت الي الدنيا
والجنة من عندك
مهما أغيب عنك
انا بكرة ح ارجعلك
انا بكرة ح ارجعلك
******
أحمد عبد الحميد
شاعر السويس . مصر
ليست هناك تعليقات:
إرسال تعليق