بقلم ... الشاعر النميري نافع

 يوم ميلادى..

٢٠ مارس ١٩٧٥..

يوم ميلادى..

أنا عارف إنه يوم..

مالوش تلاتين الف لازمة..

للقدس فيه اتحررت..

ولا السما فيه مطرت..

ولا القمر حصله خسوف..

داحنا كنا بنستلف..

من بعض الرغيف..

والفقير كان يمشي حافي..

ومن غير كسوف..

وفي العيد يجيبله صندل..

ولا جزمة..

يوم ميلادى..

اللي فرحوا بيوم ميلادى..

مش كتار..

هما يادوبك ست تنفار..

أمى وابويا وجدي..

واحمد وعلى وهدى..

اخواتي الكبار..

أصل ابويا كان وحيد..

ومولود على قفة بنات..

وجدي كان عايزله عزوة..

خلف خمس صبيان..

وتلات بنات..

ودا غير كمان كم طفل مات..

تعب ابويا وربى وكبر..

ولا عمره قال اجيب منين..

ولا عمره قال..

واقع ف أزمة..

فى يوم ميلادى..

جدي قال من فرحته..

محدش هيسمي الواد دا غيري..

طب قول يا جدي...

اتمطع جدي وقال..

هنسميه نميري..

ليه يا جدي..

هيا ناقصه لبخة ف الكلام..

ولا من قلة لسامي..

ماله احمد او محمد..

ولا سامح وماله سامى..

أصل جدي كان...

مناضل قديم..

ومن نضاله شغلوه..

غفير نظامي..

وكان بيحب ابو جعفر نميري..

زعيم سوداني..

فسماني على اسمه..

واسمي من يومها..

بقى عنده لازمة..

النميرى نافع