قصيدتي العامية التي تعبر عن كل أم ضاع حلمها.
قصيدة(احنا لازم نفوق)
لحد أمته هتفضلي
تلبسي أسود
على ضناك المسكين
حرمتي نفسك ياما
علشان يكبر
ويعوضك مر السنين
وتعبتي في تربيته
والقرش عزيز
واتحرم من التموين
وافضلتي تصبري
على الجوع
لتوفري له قرشين
تعبتي لحد ما اتعلم
دور على شغل
يقولوله مش عاوزين
وافضلتي تحلمي
يخلص جيشه
زي كل المجندين
والقدر كان مخبي
عليك غدره
بولاد ناس معدومين
وفجأة راح الحلم
مين هيعوضك
اشكي لرب العالمين
يمكن تبرد نارك
قبل ما تموتي
تلاقي زميله فرحنين
معلش بلاش تبكي
محدش بيسأل
عن هموم المساكين
ربه كرمه بناله قصر
في جنته لأن
المباني بقت للمقتدرين
احتسبيه عند ربنا
بالجنة هيدخلك
وتعيشو سوا مبسوطين
بس احنا لازم نفوق
ونراقب الخونة
متفضلش يدنا متكتفين
ونحمي ثمرة أكبادنا
على تراب أرضها
كفاية نفضل كده نايمين
يارب صبر كل أم
ضاع حلمها
فجأة في غمضة عين
بس احنا لازم نفوق
ونراقب الخونة
ليه ايدينا متكتفين
بقلم الشاعر الأديب جمال أحمد طلبه محمد
المنصورة الدقهلية جمهورية مصر العربية
الثلاثاء (٢٠٢٢/٥/١٠)
ليست هناك تعليقات:
إرسال تعليق