بقلم الشاعر الحساني عبد العزيز//مجلة بصمة اليراع للمبدعين....

 الناعورة ...

تزير لحبل من كثرة لعقادي ..

فطريق عقبة أو حدورة ..

تمه شي ماشي عادي ..

تمه حكاية أو فزورة ..

تشابكت لخيوط .. تخلطوا لعرارم ..

أو دارت الدورة ..

لي ما قادرين عليه .. خليه ..

يسقي بالناعورة ..

على خابية وحدة .. كثروا لغرارف ..

أو شلا خوابي مثمورة ..

كولا يجمع نادر .. أو شي يجمع الخشلاع ..

فكروصة مجرورة ..

ثمه شي ماشي عادي .. أو الشاهد تاريخ ميلادي ..

بلي غادي الدور الدورة ..

أو كولا يحرث فدانو ..

أو توضاح الصورة ..

أو الساقية لي تسقي جيهة ..

تسقي جوج جوايه ..

ويبان لي فالمثمورة ..

أو السارح ياخد حقو من لغنم ..

أو حقو فالصوف .. يديرو هيدورة ..

أو المرفودة توصل .. لفقيه فالجامع ..

ويقرا عليها سورة ..

أو قرايت لمسيد .. تسمع فكل قبيلة ..

أو وقت لوزيعة .. يحضر لكبير أو الصغير ..

أو وقت لغلا .. لوجوه مبشورة ..

العام راه زين .. إلى تزير لقفال للفورة ..

أو لحبل يتحلوا لعقادي .. ويرجع كولشي عادي ..

ويبان لي فالمثمورة .

              ( الحساني عبد العزيز )