شيال الهم
ـــــــــــــــــــ
فرحة قلبي
عمرها مانستني
هموم وطني
ويوم فرحي
بكيت علي وطني
وبدل عروستي
ضميته جوه حضني
طبطبت عليه بقلبي
ومسحت دمعته
بتوبي
وبطرحه لبستها عروستي
يامصر انا ابنك وعريسك
انا صخره ف متاريسك
انا شريان من نيلك
انا بستان روابيكي
انا منك انا بيكي
انا لما احزن الاقيكي
فرحه وطرحه
متزينه بياسمينك
وعقود الفل بتزينك
انا فرحك وانا جرحك
وانا فارس ميادينك
انا الحريه في سجنك
انا المسجون في براحك
انا الترياق لجراحك
انا المجروح بسلاحك
انا الندمان علي فراقك
انا الحارس لخزاينك
انا المحروم وانا زارعك
بقمح وتين وزاتون
انا العطشان وانا سابح
في نيلك جاي ورايح
انا حارس بس مش ليا
انا زارع في ارض وسيه
لاعمرثمارها كان ليا
اشوفه بس بعنيه
ممنوع من لمسه بأيديا
لكن عمره ماكان ممنوع
أقدمه لسيدي هديه
ايوه هديه
مانا العرقان والشقيان
والمحروم
والطمعان في لقمه
زرعتها ايديا
ممنوعه عليا
والمطلوب مني
اشيل هم وطن
عمره مافكر فيا
شيال الهم طول عمري
ومين شال عني همي
دول جابو وحطو عليا
ـــــــــــــــــــــــــــ
شعر/السيد حماد
ليست هناك تعليقات:
إرسال تعليق