(صوت من الماضي)
يا مسحراتي وكان بيعدي على حينا
يا مسحراتي زمان ياواحد مننا
وحشتنا ايامك ورنة دقاتك
وجمال كلامك وصوت نداءتك
ومرورك علينا كل ليلة ف الميعاد
وحفظك أسامينا وحرصك ع الوداد
م الماضي الجميل صوتك مازال معانا
ودايما فاكرينك ومحفورة صورتك جوانا
يا مسحراتي زمان يا غالي علينا
ف الشوارع والحارات ياما روحنا معاك وجينا
وياما وراك رددنا كلامك المنظوم
وبفرحة وابتسامة عشنا تلاتين يوم
ماحسيناش بتعب وجه علينا العيد
والفرحة اللي جوانا كانت تكبر وتزيد
وترتفع ضحكتنا وصداها لبعيد يروح
نجري عليك نعيد وبالحب ليك نبوح
يا مسحراتي وتعب عشان غيره كتير
دايما ناسي نفسك ومتطوع لعمل الخير
أيامك الحلوة عدت بسرعة وفاتتنا
وناسها عنا رحلوا وأشواقنا ليهم أبكتنا
معاكوا ف عيونا كانت سعيدة الحياه
والفرح ف القلب كان واصل لمنتهاه
والبركة في الايام كانت دايما بتزيد
والقليل في الإيد كافي ومنه يفيض
يا مسحراتي زمان مازلنا فاكرينك
وصاينين العشرة اللي كانت بينا وبينك
وتملي في سيرتك ومع ذكرياتك
وبنترحم عليك قصاد تضحياتك
ياللي فرحت قلوبنا صغيرين وكبار
والوقتي مشتاقين لك وحنينا لك جبار
يا طيب ياللي كنت بتعدي على حينا
ياإلي بطيبتك ونزاهتك أصبحت واحد مننا
يا مسحراتي زمان يا فرحة القلوب
حبينا رنة طبلتك ودوبنا ف صوتها دوب
يا إلي اتحملت كتير وكنت بالقليل راضي
ياصوت جميل وفاتنا مع الزمن الماضي
**********
وكل عام ونحن وأنتم جميعا طيبين وبألف خير
بقلمي وحنيني لأيام ومسحراتي زمان
حنان الجوجري
دمياط الجديدة
ليست هناك تعليقات:
إرسال تعليق