ماتستعجلوش
ـــــــــــــــــــــــــــ
ماتستجلوش
مات الامل في بكره
مات الأمان بقي ذكري
بكره ندبح بعض
بالسكاكين
لما يكوينا العطش
وتتلوي البطون
زي الحنش
ونبقي كلنا جعانين
هناكل لحم بعضنا
لو حتي كنا ميتيين
ماتستعجلوش
مش هايكون بينا
أمان
ولا هيكون فينا أمين
بكره الشر جاي
راكب شياطين
بكره الخير ينعدم
وصوت الحق ينكتم
ويخلصو المخلصين
وتنسي قلوبنا الايمان
ونكون كلنا ظالمين
لما تجف الغيوم في السما
حمل كاذب من غير مطر
ونور الشمس يسبب العمي
وتموت البصيره والبصر
حتي القمر مانشوف له ضي
ويملي ليلنا بالخطر
ويعاشر الشياطين الانس
ويتولد جيل جديد
لاهم ابالسه ولا بشر
ماتستعجلوش
بكره الخضرا تبقي صحرا
تدور علي الميه ماتلاقي
لانيل مصري
ولا فرات عراقي
وبلاد البساتين
تتحول شراقي
حتي سحاب سماها
تعدي ما فيها بواقي
نعطش نشرب دمنا
نجوع ناكل بعضنا
ويضيع الامان مننا
ونتمني لو يوم اننا
نرجع فيه لربنا
يرحمنا ويشيل عننا
ونعترف بذنبنا
احنا اللي عملنا
في نفسنا
علشان فرطنا
في حقنا
ماتستعجلوش
ـــــــــــــــــــــــــ
شعر/السيد حماد
ليست هناك تعليقات:
إرسال تعليق