بكتب بقلمي
عن كل ألمي
ف حياتي
عن اللي شفته
واللي عرفته
عن آهاتي
وذكرياتي
أنا اللي عايش ف المعشقة
فحت وردم ودايق الشقا
دنيا غريبة طباعها عجيبة
ومعلقالي المشنقة
دايق المر بالبراميل
حاطالي المر ف المواويل
بتسقيهولي بالمعلقة
دنيا ماشية معايا عكس
بلا رحمة
حواليا زحمة
لا لاقي لحمة
ولا حتي عدس
دنيا ظالمة
وعاملة حالمة
عمالة ترقص
رقص عالمة
وعندي عاملة صوان عزا
خدت إيه من الأستذة
ضغط وسكر فقر وقهر
ونرفزة
ياريتني كنت العصفورة
انقل أخبار المعمورة
كان زماني ف المقصورة
بستلم الكاس
مرفوع ع الرأس
مليانة الحال
ساكن فيلا
معنديش خلل
مش عامل حساب للأيام
مسألش مين وليه وبكام
اصحي وأنام
واكل حمام
عايش حياتي بالانسجام
هادي وراضي
أحايل وأدادي
وأشوف ولادي
ف أحسن حال
علم وأدب وكمان مال
أروح آخرتي
ف قلبي شايل فرحتي
وبالعبادة تكمل سعادة
ف الدنيا علم
والآخرة حلم
وأدوق حقيقة
يدوب دقيقة
مش تمثيلية ولا حتي فيلم
قول ياقلمي
عن آمالي
عن مر ألمي
عن حياتي
عن آهاتي
وحد يحكي عن مماتي
من الناس المصادقة
وكفاية بقي
د. هشام سليم
شاعر الحرافيش
ليست هناك تعليقات:
إرسال تعليق