محتال ( شعر للأطفال )
كان مرة في محتال
دخل المدينة وقال
محتاج قوام في الحال
خمسين من الأشبال
مع كل شبل شوال
واسع يشيل المال
من كنز في الأدغال
وعشان أكون دلال
إدوني ألف ريال
والفجر قبل النور نترك جميع الدور
ونعدي بره السور نوصل طريق مهجور
المشي فيه محظور نوصل لباب مسحور
قدامه ديب مسعور واقف بقلب جسور
نرميله ناقه يغور
العمده كان فرحان جمع البلد في ميدان
وبسرعه أدلي بيان يا ايها السكــــــــان
ما عدش فيه حرمان من عندي يا جدعان
ح أبعت تلات غلمان والناقة ويا حصان
يرجع لنا مليان
محتال وكان ليهم دليل
والفجر كان وقت الرحيل
خدهم إلي سفر طويل
وف غابة ما بين النخيل
حطوا الرحال فوق النجيل
قال استريحوا لما أميل
بالناقة والفرس الجميل
جايز أبدلهم بفيل
جامد عشان يقدر يشيل
وف لحظه كان شق السبيل
والباقي عاد من غير دليل
قال الحكيم ناصح سهم الطمع جارح
حاسب من المكره والوهم يا صالــح
لو تزرع الشجره تلقي الثمر طارح
والمجد والشهره للفرد لو كافـــــح
من غير خيال سارح
من غير خيال سارح
*********
أحمد عبد الحميد
شاعر السويس والكنانة
مصر 01012657350
ليست هناك تعليقات:
إرسال تعليق