عبد الفتاح عبدالرحمن والي
(أرض الطيبين)
جوم يا ددع دج وتاد المراسي
ونادم عخيك في الهنا
ويش تسوي غير تفرج التماسي
ورص الشال كده
رصه وراها جصه تعدل في راسي
ونبوتك سلاحك ما يهابه إلا العدا
ما يهابه خيك غير الغفلان الناسي
أنا يا اما جولت عليك ددع
وفي الحج ما تخاف كل المأسي
حجيجي واد بوك
لا كلت في يوم حرام
ولا جلت كلمه ما تسواشي
وإن فرجوا النصايب عالخلايج
يكون نصيبك رضا وجناعه ما تعلاشي
ولما ينادموا عليك
جول وآه حاضر دنيا ما ديما شي
لا الأصيل هيرخص
ولا الخسيس هيعلي العراشي
دا إحنا الكرام حاميين الحجوج
والعدا حاجنا وكتر بالجوي مواعيده ولا جاشي
ما أرضنا ورث الطيبن
وطينا من روح الأسمراني
الأصل عذابي والنبع نجاشي
وترسمت علينا الملامح يبوي
السمره تروي جلوبنا واللغراب ماخلاشي
وعضي الجنادل نسجنا الجمال
جول الحج ولو عالفراج
ما الجد من غير هامه ما لازماشي
ولا تنسي تسنكر في وش الشيطان
وترجع ياوليدي للحج هامتك متأخره ما لحجاشي
أصلنا نبت الطيبين وزرعنا إتسقي
دمع الحبايب والباطل غفل ما يدراشي
وعكل شواشي الشجر
بتهفهف عمايم لكبار
وتحط عالعرجون كل النواشي
في طلتنا هيبه ووجار
منين ما نروح تتأرج الحواشي
لا يوم جبلنا العوض
ولا يوم مات لينا طار ما جاشي
ولا البنته جالت وحش يا بوي
دا صلعان غيره للجواز ما عايزاشي
حتي الصغار إتولدوا رجال
في ضهر بعض سند وعزوه
لو جت الأه في يوم تغور ما تستناشي
والكل يشوف الحج في كل وجت
كان مين يدلع ولا يموع
ولا عن كلمه صايبه
ولو ما جالها يموت ما يعماشي
كلمه في دروب الحج
حبيت أجولها زي ماهي
عجبت ما عجبت
ما هنسي ألم خلجاتي وأنا ماشي
19/07/2022
لو هناك كلمه غير واضحه
برجاء قلب الجيم قاف
وجاهز لاي استفسار
ليست هناك تعليقات:
إرسال تعليق