ثورة سلمية
إنت شارب أو مسطول
يا عيني شو عمبتقول
ما بدّك وزرا ونوّاب
من الريّس حتى البوّاب
فيني إفهم شو عملوا
أو شو عليهم وما عملوا
كنّك إنت مش من هون
ولا سامع ب فلان وعون
يا خي قطعوا المعاش
وبلا مصاري ما بعتاش
الفواتير عليّ كتير
كهربا واللمبة توفير
للشركة وللموتير
وللناطور وللشوفير
وللنت والتلفون
والمي بالجالون
مندفع تمنها مرتين
مرة كاش ومرة دين
وبقولولي ضرايب
وشعري منن صار شايب
وعبواب المستشفى بموت
وقت البدهن هنّي بفوت
وبتعب لجيب شهادات
وبوقف عبواب الشركات
هيدا خود وهيدا هات
وبرجع بتنهّد آهات
وبعدك بتقلي مسطول
وعن كلامي أنا مسؤول
لو ما سرقوا الخزينة
وسرّبوها برّا لمدينة
وصرفوا الهن بالشيكات
إشي فيلّات وسيارات
ولوْلادن أعطوا هبات
نثريّات وسفريات
كانوا المصاري كفّوا
والمتلي ومتلك خفّوا
يرجعوا المال لصحابو
من مطرح يلي جابوا
ويوقْفوا شوية تبزير
ويتّبعوا شوية توفير
والغني يعطي الفقير
منعيش سوا كبير صغير
ما لبنان حلو كتير
بيستاهل شوية تفكير
ويبطلوا الطائفية
البتجرّح فيك وفيِّ
ولو يعطوا هالجنسية
للإمُّن لبنانية
وترجع خضرا الطبيعة
لما ينضفوا هالبيئة
هيّ شوية مطالب
غيرا يا خيّ مش طالب
بدا تتحقق يبقوا
بقلبي ولبنان بقلبو
هيدا الوطن للجميع
متل الزهر ال بالربيع
انا مش هاوي تحدّي
اذا بدك توقف حدّي
وهيك تنينتنا منضل
نزرع أرزة كبر السهل
البدو يقلعها مش سهل
ارزتنا اللبنانية
فاطمة البلطجي
لبنان /صيدا
ليست هناك تعليقات:
إرسال تعليق