(من خلف زنزانة السكات)
من بعد تلاتين سنة
هجر وصد وأهات
أطلقتى سراح حبنا
من خلف زنزانة السكات
وأللى فيها أندفن حبى
وأفتكرته جواها مات
أيه أللى خلاكى النهردة
ترجعي الماضى
وتعيدى الذكريات
وتقولى عنى دا كان وكان
وتحكى حكايتنا للبنات
حكيتى عن حبى ليكى
فى الصغر والبراءة والأمنيات
وعن ساعات السفر لماأجيكى
وبشوقى أطوى المسافات
لأجل نظرة من عينيكى ترد
روحى وتدوب فيا الأهات
حكيتى لهم عن شوارع
مشينا فيها أو حارات
زى شارع فيصل مثلا
ولما روحنا الأهرامات
يومها جري الوقت بينا
وأحنا نحكى وبالساعات
أفتكرتى لما تهنا فى الطريق
حكيتى لهم عن
جنينة الحيوانات
كنت طاير من السعادة
بيكى زى طير بجناحات
ياعزيزتى العمر راح سكات
وأللى باقى مش قد أللى فات
وأللى ينبش فى القبور
ميلا قيش غير الرفات
_________________
وصلت الرسالة متأخرة
الشاعر/حسن طه
السويس 1/2/2021
ليست هناك تعليقات:
إرسال تعليق