نوح ياحمام نوح
ضى القمر مدبوح
مستنى طلوع الروح
دمه بين البشر نازف
مين عارف؟
ومين موش عارف؟
مين يقدر يقولى؟
مين راح يسمعنى؟
يسمع الصوت الاخرس
النفس المكتوم
والقمره الطارحه
بذر الموات
طرحت عيال
مفيهاش ريحة العيال!!
قبل ماتبتدى غنوه
راح تنتهى الغنوه
من سكة الطلوع
لسكة الرجوع
من حلق الكلام
لصرخة السكات
يفرش الموات
حرير ومقصب
نوره من ضلام
خيوطه من حديد
قصيده من مجنون
يانازل الطلوع
ياطالع النزول
يامتشعلق على الحيطه
هات لى معاك بيضه
اعلقها على الشباك
واعملها انا قمره
امسكها وادفيها
يدوب الصفار فيها
حتى طلوع النهار
اشقها نصين
يرمح منها صفار الموات
اكحل بيه عيون العتمه
وانادي ع العيال
وارسم هلال
يتكون من جديد
يحبل ضى
يولد قمره
ليست هناك تعليقات:
إرسال تعليق