حكاوى زمان
مليت حكاوى زمان من كتير تكرارها
وخاصه حدوته احنا طلعنا القمر
حواديت كلام ف كلام
وايه فايدة الحواديت واحنا محلك سر
والدنيا كدابه ومزينة دارها
واللى تغره الزينه هو اللى خاب وخسر
شديت رحالى وقولت أنا مسافر
يمكن تكون غربتى دوا للعذاب والمر
لملمت كل اللى بقى منى
وطلعنا بالمركب ووصلنا عرض البحر
امواج تشيل وتحط
يأما هنكمل يأما مش هنمر
صلينا للى خلق البحر والمركب
وصوت الدعاء ارتفع من قلب خالص حر
مر الفزع والخوف والستر خيم علينا
وهديت الموجه ولمحنا نور البر
شيلنا الحمول ونزلنا ع المينا
والرحلة من طولها العقل تعبه الفكر
وبدل الشغله ميت شغلانه ف ايدينا
والغربه واخدانا وماعدش منها مفر
اتملكت مننا وبقينا خدامها
وبنيجى قدامها ووشوشنا دى تصفر
فكرنا أن الفلوس هتغير المكتوب
والله لو فقرى هتعيش تموت ف الفقر
ولو قارون بكنوزه فى جيوبك
هتفيد بايه الكنوز اخرتها متر ف متر
اعقلها وتوكل وخد باسباب النجاة
وعملك الطيب بيه ع الصراط هتمر
إسعى وحاول واخلص لربك نيتك
وان كان نصيبك خير عُمر البشر مايضر.
ليست هناك تعليقات:
إرسال تعليق