الله يحد الباس
آجي نفرقو للي عندنا بالمغارف
ونجمعو ونبنوا ونطلعو الساس
اش من زمان الخو على خوه حالف
ولاو كالعديان الكلام بيناتهم قرطاس
الاحباس عمرت والميمات عيات بالكفاف
الصحة رشات والذات تهدت وشاب الراس
واش اللحية تهز الليحة على الكتاف
وشحال يگد من الملح لطعام الغدر الى مساس
الدرويش عيى من الطلبة والتسلاف
و غير الخبز واتاي مسكت مصارنو ورافس
كبوطو على ظهرو بالشمس كشاف
وقلال مكانو بين اهلو وناسو في الاعراس
كثر الهم والزواق والنفاق والتخراف
وكلام كثييييببر خليتو بين الأقواس
يتفهم من بين السطور و بلا تكلاف
بحال يرحمك الله ا سيدي عند العطاس
واتهلاوا في الصحاب للي على القلب خفاف
وغير خليها على الله وتبسم وگول لاباس
خيوط المحبة ولاو في زمانا رهاف
والناس ولات تعطي القيمة غير للباس
سعداتك القلب الكبير للي يحس بالضعاف
باقية فيه الرحمة وباقي فيه الاحساس
غلب خزها على ماها ومابقى ما يتشاف
هذا حال الدنيا وما نگولو غير الله يحد الباس
نجات بوريشة
ليست هناك تعليقات:
إرسال تعليق