العين بصيره والإيد قصيره
من جوعي والله بعت الحصيره
روماتيزم مرضي من برد أرضي
وبين كان وصار صفينا سيره
*********************
العين بصيره وأولادي جاعوا
بالحاره عنا حكيوا وشاعوا
الاطبا قالوا فضي نخاعو
صايبتو عله بشعه وخطيرة
*********************
العين بصيره وزماني قاسي
لا لا مابعتب ع أهلي وناسي
الكل متلي عمال يقاسي
وأهل المروه باعت ضميرا
*********************
التاجر يغللي ت لفوق يعللي
اقلو دخلك أخرس يقللي
ياخد كرامتي ويبيعني ذلي
لآخرتو يجمع ذنوب كتيره
********************
العين بصيره ورقابة مافي
ع المصوا دمي وقالوا صافي
التسعيرة تطلع بشكل خرافي
يتلاعبوا فيها صرنا بحيره
********************
الراتب يعلا والسلعه تغلا
واركض ياعمي اللعبة تحلا
تاجر لتاجر يقللو أهلا
إنهب وأسرق وأجمع طميره
********************
يا أمة الله حرام عليكم
كرامه لله أبوس إيديكم
تبكي عيوني تضحك عينيكم
وجوع ساكن بكل ديره
********************
********************
شعر ؛ نذير دهان
ليست هناك تعليقات:
إرسال تعليق